انتظار المستحيل !!!

من طرف قائد الاسطول السبت مايو 31, 2008 7:33 am

انتظار المستحيل ..
صحًى في جواي شجونِك
مهّد السكة الرتيبة
لي حوافر الخيل يجن
لي لما اتوسد عيونك ..

واحتمال إنك شموس
تضوي في كل المداين
تفرح الدنيا بلقاك
واشقى في دنياي بدونِك

أصلي أدمنتك غُنى
قبلة للمظلوم يغالب
في عذابات الزمان
يفترش في الليل سكونِك

صحوة الزمن العنيد
لجّة البحر البتوًه
عتمة القدر الأكيد
أبقي نبضة روح بتغشى
سدرة في البر الأمين
أمنية تظلل خطاي
وراحة من تعب السنين

كنت بترجى الإرادة
لو أطول ومضة صفاك
دندنة عصبي الموتر
وإنكسارو على غناك
زي ضنا الشقيان يساسق
في دريبِك وما لقاك

افتقدتك زي غريق ..
في وسط بحرو العميق
هدّتو الأمواج كتير
ضاعفت حزنو وعناهو
نامت الرؤية في عيونو
وغابت الشطآن وراهو
بحلم انو الكون سفن
شقّت عباب اليم تجاهو
شايلا في جوفا الخلاص
كلِّ احلامو ورجاهو
يبتسم للدنيا ضاحك
ينسى جور زمنو وقساهو
يمتزج لونِك بنبضو
ويسعى ليك شايلك مناهو

وفجأة ما بين إنو بحلم
وإنو مجبور يبقى شايف
يرتحل وصفِك يغيب
في ضباب مطر العواصف
في حشا الهم اللي واقف
في المدى البين إنو ليك
وبين مصير خلاهو خايف
يشتل الأيام صبر
يحصد سراب خداع وزايف
يمشي تاني علي الوهم
جواهو جرحِك لسة نازف
يا رحيم بي حالي ارحم
انت شايف البيّ عارف
أسألك ضياً يهد
حيل الضلام الفيني واقف
أسألك ضياً يهد
حيل الضلام الفيني واقف