سرقو موبايلي

من طرف قائد الاسطول الأحد يونيو 01, 2008 3:54 am

سرقو موبايلي
أول حاجة اوع تفتكروني عاوز اغني ليكم الغنية المشهورة بتاعت الهيلاهوب لكن حاقول ليكم قصة واحد عزيز علي شديد فقدتو كان ونيسي وصاحبي وصديقي وصبر علي واستحملني كتير مافي واحد استحملني قدر ما استحملني زولي دا يا جماعة صبر على البري بتاعي والنقة والحجة حتى يوم زعلت فشيت زعلي فيو وجدعتو في نص الزلط وصدمو تاكسي قمت لملمتو ولا حتى اعتزرت ليو لا وديتو لا مستشفى الحوادث ولا حتى ام درمان لكن برضو سكت واكلها لبادي ساي ما قلت ليكم زولي دا صبر علي صبر شديد بس ما بلحق صبر سيدنا ايوب اها يا جماعة زولي دا عزيز علي شديد عشان كدا عليكم الله جهزو دميعاتكم الفقد عظيم والما بنزلن ليو دموع يختانا وما يكمل القصة وادعو لزولي انو يكون سعيد وما اظنه سعيد بفراقي .
أول حاجة اتكلم ليكم عن ولادتو يوم ولادتو كان يوم فرح عظيم بارك لي الأصحاب والأحباب وسد خشم الشمات
وبقى الخبر مانشيت رئيسي علي لوبه جابليو ان سبعين انا من كتر الفرحة مبتسم التقول جضومي ماسكنهم بمشبك مبتسم اسبوعين وقدر ما يدق الموبايل وبالزات في الحافلة وخصوصا لو في كم جكسوية كدا ابتساماتي تبقى عريضة لمن يقربن ضروسي ينخلعن ولا لمن يجي واحد من فردي يقول لي موبايلك شدة عليك الله ما قلت ليكم موبايلي دا قيمني اول مرة زول يقول لي عليك الله ولو خليتو مع زول فترة طويلة بفقدو زي الأم الفاقدا جناها يمين الله انا حبيتك حب يا الان سبعين
المهم يا الحبيبين ولدي كبر وبقى عمرو شهر والناس مستغربة غريبة علي الأروش دا ما فقد موبايلو ولا حتى سرقو زول من نشالين السوق العربي البسرقو الكحل من العين يمين الله بدي الجنة علي الأروش ما يسرقو وعلي ود فتحية المكمل التفتيحة اليوم التاني موبايلو يتسرق ما قلت ليكم الله بدي الجنة المهم الموبايل خشى في الشهر التاني وفي عيني لسع شافع لأن الأم بتشوف ولدها شافع مهما كبر المهم في الشهر التاني اخوكم مبسوط بسطة عدوك التقول مشتري من يومين بس في نفس الجديع ونفس الحركات والعجيب لو لقيت لي واحد صاحبي لي منه فترة قبل السلام والأحضان اقوليو ما جابو ليك الخبر انا دخلت لي في ان سبعين ويازول تبدا التبريكات والتهاني واخوك مبلم ومبسوط وام فريحانة تكون ماسكاني طول الونسة اها في نص الشهر كدا انتهت الامتحانات وسافرت السعودية وخليت الموبايل عهدة مع اخوي بكري ودعت موبايلي وداع شديد وانا اقول ما كان الفراق منية ولا فرقة عيونك وعد وكيف كيف لما الفراق يحصل ان شاء الله ما يحصل ودعتو ولسان حالي يقول :.
ودع حبيبك فإن الركب مرتحل .... وهل تطيق فراقا أيها الرجل
مرت الشهور وانا في البلد الطيبة ديك وقلبي على موبايلي بهنا واقول في قلبي يا بكري حافظ على موبايلي دا موبايلي جا بعد تعب شديد، المهم بعد فترة بكري اخوي جا السعودية سلمت عليو وبعد حق الله بق الله بدون أي مقدمات قلت ليو الموبايل كيف اها استلمت موبايلي والشوق كان قاتلني وكان يوم اللقاء يوم تاريخي ولسان حالي بقول :
جيت بشوق الدنيا كلو... همي بس كيف كان اجيك
المهم رطبت في البلد ديك وموبايلي رطب معاي ترطيبة شديدة الموبايل لقى الكوندشن والجداد بس بطنو كانت طامة شوية من الجداد عشان كدا بس كان بياكل ويشرب كهربة برضو ما قصر معاي في البلد ديك جيهني جيهة وميزني مييز شديد انتهت الاجازة وجيت قالب للبلد دي
أي زول يقول لي مشيت بموبايلك دا السعودية وجيت بيو مالك ما غيرت موبايلك دا أسكت وأقول في نفسي هو انا عندي غيرو
على قول الفنان وأنا أحب غيرك ايش فيا انجنيت حتى مرات لمن الشبكة تطش أو بطارتو تكمل سريع بزعل منه شديد لكن برجع ولسان حالي بقول مسامحك يا حبيبي مهما قسيت علي شاحنك عارفو اسود وكفرك عارفو ابيض وكلك حسن نية تيت تيرت ترترا ولمن تطول ما تجي في موبايلي رسالة بقول مافي حتى رسالة واحدة بيها نتصبر شوية
كم ودر علي من زهج وانسني في وحدة كان ظريف شديد بحكي لي نكت بخليني اضحك لمن يطلع لي ضرس العقل واقع في الواطة من كتر الضحك وكان عندو صوت سمح بغني اغاني سودانية ومصرية وخليجية وحتى هندية وأغاني شايقية ميزني بالحيل وميز الناس المعاي ويجيك زول يقول ليك بالله حول لينا حاجة بس الحمد لله نانسي عجرم اصلها ما اتشرفت ودخلت في الموبايل موبايلي لاهو عارف نانسي عجرم منسترة ولا ما منسترة وبعد فترة دخلت بيو النت وبقى يدخلني النت شي مسنجر وشي تصفح وشي ونسات بالمسنجر حتى بقى لفترة ما بستقبل اتصالات للنت بس
صدقو موبايلي دا لو قعدت اشكرو لباكر ما بسكت هو اشكر فيو شنو واخلي شنو اريتك ترجع لي تاني انا اقول فيك شنو واخلي شنو يا صديق الدرب يا عشرة سنة وشهرين شعبيتك عندي اتعدت شعبية الفول
يوم العزاء
في ذلك اليوم الذي دخل فيه المتمردون العاصمة المثلثة وخصوصا منطقة ام درمان فقدت أعز الأحباب لا أقول فقد ولكن أقول اختطاف وكالعادة يفتقد العظماء في الأيام العصيبة اختطفته يد ماكرة غدارة في الساعة الخامسة والربع من صبيحة يوم الاحد خرج احد افراد المنزل من المنزل وترك الباب مفتوحا وكان الفقيد ينام بجانبي وهو موصل بالشاحن فرآه أحد أصحاب الايدي الطويلة واختطفه عنوة واقتدار اختطفوه وبأي ذنب اختطفوه هل زهب لمعركة أو قاد تمرد اختطفوه لأنه كان انيسي وصديقي اختطفوه ليكدرو صفوي اختطفوه لانه كان سبب في صلة الأرحام والسؤال عن الأصحاب باي ذنب اختطفوه ولأن العظماء لا يختطفون لوحدهم اختطفوه ومعه الشاحن هنيئا لك ايها الشاحن بتلك الرفقة وهاهو الموبايل يقدم اكثر صورة للوفاء والعرفان بأن يرفض الذهاب لوحده بل كان الشاحن رفيقا لذلك الفقيد هنيئا لك ايها الشاحن بتلك الصحبة فقد دخلت التاريخ من اوسع ابوابه استيقظت من نومي وكعادتي عند استيقاظي القي عليه نظرة واطبطب عليه ولكني فوجئت بأني استيقظت ولم اجد رفيق الدرب بحثت عنه في جميع ارجاء المنزل لم اترك كبس من اكباس المنزل الا وتفقدته وتحسسته وسألته
عندما لم اجده اتصلت عليه فاذا بالمجيب الآلي يقول ان الهاتف المطلوب لا يمكن الاتصال به الأن نرجو الاتصال في وقت لاحق فعلمت حينها ان رفيق الدرب قد لمح لي وقال لي بأني اختطفت لم أستطع الا ان أقول انا لله وانا اليه راجعون اللهم اجرني في مصيبتي واخلف لي خيرا منها واستعنت بالمثل الذي يقول اذا كثرت عليك الهموم ادمدم ونوم امتثلت للنوم على مضض سامحك الله أيها السارق فقد كدرت صفوي وقديت مضجعي ونزعت الابتسامة من شفتاي التي لم تفارقني حتى في أحلك الظروف لو علمت بمعزة الفقيد لدي لما فعلت فعلتك التي فعلت وانت من السارقين بل انت من الماكرين والمخادعين والمستغلين نقاط الضعف وقد كنت في أضعف ما يكون كنت ميت ميتة صغرى سامحك الله على هذا الغدر وانا اتذكر الفقيد اتذكر نكاته اتذكر ضحكاته اتذكر صوته الشجي استيقظت بعد ساعة وإذا بي اسمع همهمة في كل أرجاء البيت يتحدثون عن الفقيد وكيف اختطف ومن المذنب ومن المسؤول ومن المقصر وانقلب الناس إلى معزين ومواسين وساخرين وشامتين ومنتقدين على الإهمال يا لك من عظيم حتى عند ذهابك لم ترضى إلا وان تكشف لي الناس فقد عرفت (الكبس) و(وعد) (وأيمن) على نواياهم الخبيثة تجاهي وحقدهم الدفين فاستيقظت على سخرية (وعد مالك وهي طفلة صغيرة بنت خالي ) وبدأ (الكبس) في الاتصال بصديق دربه (ديوم) ويطلب منه ان يأتي لي بالموبايل بطريقة ساخرة كوميدية يحسده عليها حتى عادل امام ولمن لا يعرفون( (ديوم) فديوم شخصية خرافية( الكبس )يعتبره من اعز أصدقاءه ويشتهر (ديوم) بالمقولة التي يرددها عندما يريد إن يخيف أعداءه فيقول : "أنا ديوم ساخن سعران أكلت اثنين بنات خالات "وبكل براءة يخرج (الكبس )ساعته ويتصل على ديوم ويتحدث معه بشأن فقيدي وبعد ان يغلق الخط يطمنني بأن الأمور على ما يرام وان الموبايل في غضون ساعات سيكون في حوزتك ما أشبهك أيها (الكبس بحكومة) الإنقاذ في التصريحات الكاذبة ولمن لا يعرفون الكبس هو ابن خالي وهو طفل لا يتعدى الثلاث سنوات ولقبه الكبس واسمه محمد مالك
أريت الدنيا تضحك لي.... ويرجع لي انا نور عيني
ولازال البحث مستمر عن الفقيد
أوصافه لونه أسود يلبس قميص أبيض اللون من الأمام وبني اللون من الخلف يوجد به بعض الكدمات في الطرف السفلي من الموبايل ومشلخ بالجمبات ولكنه لا ينتمي لقبيلة الشوايقة هو من النوكياب
الرجاء من وجد الفقيد إخبارنا بأي معلومات وله جزيل الشكر